CJP आंदोलनाच्या पार्श्वभूमीवर विद्यार्थी नेते रोहित ढाले यांना परळ येथील राहत्या घरातून पोलिसांनी घेतले ताब्यात
मुंबई, (अजित मोहिते) | ११ ऑक्टोबर २०२६ : मुंबईतील विद्यार्थी नेते रोहित ढाले यांना परळ येथील त्यांच्या राहत्या घरातून पोलिसांनी ताब्यात घेतल्याची घटना समोर आली आहे. ११ ऑक्टोबर रोजी आयोजित करण्यात आलेल्या CJP आंदोलनाच्या पार्श्वभूमीवर ही कारवाई करण्यात आल्याची माहिती मिळत आहे.
लोकशाही व्यवस्थेमध्ये प्रत्येक नागरिकाला आपले मत मांडण्याचा, प्रश्न विचारण्याचा आणि शांततापूर्ण मार्गाने निषेध नोंदवण्याचा अधिकार आहे. अशा परिस्थितीत विद्यार्थी नेत्याला त्यांच्या राहत्या घरातून ताब्यात घेण्यात आल्याच्या कारवाईबाबत प्रशासनाने स्पष्ट भूमिका मांडणे आवश्यक आहे.
लोकशाही व्यवस्थेत प्रश्न विचारणे हा गुन्हा ठरू नये. विद्यार्थी आणि युवकांचा आवाज ऐकून घेणे, त्यांच्या प्रश्नांना योग्य उत्तरे देणे तसेच लोकशाही मूल्यांचा सन्मान राखणे ही प्रशासनाची जबाबदारी आहे.
रोहित ढाले यांना कोणत्या कायदेशीर तरतुदींनुसार ताब्यात घेण्यात आले आहे, तसेच त्यांची सद्यस्थिती काय आहे, याबाबत मुंबई पोलिसांनी अधिकृत माहिती जाहीर करावी, अशी मागणी करण्यात येत आहे.
लोकशाही मूल्ये, अभिव्यक्तिस्वातंत्र्य आणि शांततापूर्ण आंदोलनाचा घटनात्मक अधिकार यांचे संरक्षण होणे आवश्यक आहे. या प्रकरणी प्रशासनाने पारदर्शक भूमिका घेऊन वस्तुस्थिती स्पष्ट करावी, अशी अपेक्षा व्यक्त होत आहे.
