वाघाच्या बातमीने वाकी गावात घबराट; सभापतींच्या चातुर्याने व्हायरल फोटोचा पर्दाफाश!

वाकी : नवरात्रीची पहिली रात्र… गावात सर्वत्र गरबा खेळण्याचा उत्साह, तरुणाईचा जल्लोष आणि सणाचा आनंद ओसंडून वाहत होता. मात्र, या आनंदाच्या वातावरणात अचानक एका वाघाच्या फोटोने अशी खळबळ उडवली की, क्षणात गावातील वातावरणच बदलून गेले! काही वेळापूर्वी गरब्यात रमलेले गावकरी वाघाच्या चर्चेने धास्तावले. मात्र, गुहागर पंचायत समितीचे सभापती प्रणव पोळेकर यांच्या चातुर्यामुळे या व्हायरल फोटोमागील सत्य समोर आले आणि अखेर गावकऱ्यांचा जीव भांड्यात पडला.

घडले असे की, आरेगाव येथील एका तरुणाने वाकी येथील जिल्हा परिषद शाळेच्या पाखाडीजवळ पट्टेरी वाघ दिसल्याचे सांगत वाघाचा फोटो पाठवला. पाहता पाहता हा फोटो गावाच्या व्हॉट्सॲप ग्रुपवर व्हायरल झाला. पट्टेरी वाघाचा फोटो पाहून अनेकांच्या काळजाचा ठोका चुकला. यापूर्वीही परिसरात वाघ दिसल्याच्या चर्चा कानावर आल्या असल्याने अनेकांनी या फोटोवर क्षणाचाही विलंब न करता विश्वास ठेवला. मग काय, संपूर्ण गावात भीतीचे वातावरण पसरले!

फोटो पाहून सभापतींना आला संशय!

वाघाच्या दर्शनाची माहिती वन विभागाला द्यावी, या उद्देशाने हा फोटो गुहागर पंचायत समितीचे सभापती प्रणव पोळेकर यांच्याकडे पाठवण्यात आला. मात्र, फोटो पाहताच सभापतींनी तो बनावट असल्याचा ठाम संशय व्यक्त केला. केवळ फोटो पाहून घाबरून न जाता त्यामागील सत्य तपासण्याचा निर्णय त्यांनी घेतला.

सभापतींनी तातडीने संबंधित प्रत्यक्षदर्शी तरुणाशी संपर्क साधला. सुरुवातीला तरुणाने आपणच हा फोटो काढल्याचे सांगत तो खरा असल्याचा दावा केला. मात्र, सभापतींनी त्याला दुसऱ्या दिवशी आपला मोबाईल फोन पंचायत समितीत घेऊन येण्यास सांगितले. मोबाईलच्या गॅलरीतून फोटोची सत्यता तपासली जाईल, असे स्पष्ट होताच तरुणाचा बनाव उघड होण्याची वेळ आली!

मित्राला घाबरवण्यासाठी केला बनाव!

मोबाईल तपासण्याची वेळ येणार हे लक्षात येताच संबंधित तरुणाने अखेर सत्य कबूल केले. आपल्या मित्राला घाबरवण्यासाठी आणि आपण किती हिंमतवान आहोत हे दाखवण्यासाठी आपण हा बनाव केल्याचे त्याने सांगितले. अशा प्रकारे एका खोट्या फोटोमुळे संपूर्ण गावात निर्माण झालेली भीती क्षणात दूर झाली.

सभापती प्रणव पोळेकर यांनी गावकऱ्यांना घाबरून न जाण्याचे आवाहन केले. खरोखरच त्या ठिकाणी वाघ दिसला असता, तर वन विभागासह संबंधित यंत्रणेला तातडीने घटनास्थळी पाठवून आवश्यक ती कार्यवाही केली असती, असेही त्यांनी स्पष्ट केले.

अखेर भीतीचे रूपांतर सुटकेच्या निःश्वासात!

नवरात्रीच्या उत्साहात अचानक आलेल्या या ‘वाघाच्या संकटाने’ गावकऱ्यांची चांगलीच धांदल उडवली होती. मात्र, सभापतींच्या प्रसंगावधानामुळे फोटोमागील सत्य उघड झाले आणि गावकऱ्यांनी सुटकेचा निःश्वास सोडला.

या घटनेने एक गोष्ट मात्र अधोरेखित केली—सोशल मीडियावर आलेली प्रत्येक गोष्ट खरी मानू नये. कोणतीही बातमी किंवा छायाचित्र पुढे पाठवण्यापूर्वी त्याची सत्यता तपासणे आवश्यक आहे. अन्यथा, एका खोट्या फोटोमुळेही संपूर्ण गावात भीतीचे वातावरण निर्माण होऊ शकते!